መልኬ ናፈቀኝ

(ኖቬምበር 16/2001፤ ድሬስደን፣ ጀርመን/ READ IN PDF)

እኔስ የናፈቀኝ መልኬ ነው መልኬ ነው፤

መልኬ ነው ናፍቆቴ ጥቁሩን የቀይ ዳማን፣

ጠይም አሳ መሳይ ብስሉን ቀይ በርበሬን፣

ቸኮሌት መልክ ያለው የበሰለን ወይን፣

እኔስ የናፈቀኝ መልኬ ነው መልኬ ነው።

ክርድድ ያለ ፀጉር ልስልስ ያለ ሉጫ፣

ወተት መሳይ ጥርሶች፣

ቅልስልስ አንገቶች፣

የሚስቁ ዓይኖች፣

እኔስ የናፈቀኝ መልኬ ነው መልኬ ነው።

ደርባባ ቁመና ደርባባ አረማመድ፣

ደርዝ ያለው ፈገግታ ጥዑም አነጋገር፣

አፋራም እህቶች፣

ጎምላላ ወንድሞች፣

ቁምነገር አዋቂ የጨዋታ አባቶች፣

ቤተ መቅደስ ሳሚ ቆራቢ እናቶች፣

እኔስ የናፈቀኝ መልኬ ነው መልኬ ነው።

ነጭ የሕዝብ ባሕር ከሰለጠነበት፣

ካጥለቀለቀበት፣

የነፍስ ብቸኝነት ግዘፍ ከነሣበት፣

ከዚህኛው ሕይወት፣

እኔስ የናፈቀኝ ያነኛው ድህነት፣

የነፍሴ ጓዶቼ የሚፏልሉበት፣

እኔስ የናፈቀኝ መልኬ ነው መልኬ ነው።

ሰው ነፍስና ሥጋ ሰው ውኃ ሰው አየር፣

ሰው እሳት ሰው አፈር፣

ሆኖ የሚኖርበት፣

መልክ ገጽ አካሌ የተቀረጸበት፣

ያኛው ቀዬ መንደር፣

ያኛው አገር ሰፈር፣

እሱኛው ሕይወቴ፣

እሱ ነው ናፍቆቴ።