አድዋ ምኑ ነው?



(READ IN PDF)

ድፍን ኢትዮጵያን እስቲ ልጠይቀው፣

ምኑ እንደሆነ አክሱሙ አድዋው፤

ተጠየቅ ጦቢያ መልስ መልስ ካለህ፣

ምን ትርጉም እንዳለው አድዋ መዝመትህ።

ተጠየቅ ና! መልስ እኮ ምን ምን አለህ?

ካገር ጥግ ተምመህ ከትግራይ መድረስህ፤

አንተ የዳር አገር ሰው ባለ ምንሽሩ፣

ባለ ዲሞትፎሩ ባለ ጦር መውዜሩ፣

አገሬን አትንኩ ብለህ የከተትከው፣

ተጠየቅ ና መልስ አድዋ ምንህ ነው?

ቋንቋህ ቅይጥ ልዩ ዘርህ ከዳር አገር፣

ሀብትህ አንዲት ቁና አፈር ገፊ አፈር፣

ቁናህን ወርውረህ አፈርህን ጥለህ፣

ዘገርክን ነቅንቀህ ጋሻህን አውርደህ፣

አገር ብለህ ዘምተህ አገር ብለህ ሞተህ፣

ካድዋ ተዛምደህ ታድዋ ተዋልደህ፣

ከትግራይ ተግርየህ ከጎንደር ጎንድረህ፣

ከሸዋው ሸውተህ ከኦሮሞው ውለህ፣

ጦቢያ ነኝ ብለህ ደምህን ገብረህ፣

“ምንህ ሆነ አድዋ” እስቲ ልጠይቅህ።

የሰበርከው አጥንት የፈሰሰው ደምህ፣

የበተንከው ትዳር ያጎደልከው ጎንህ፣

አገር አቆም ብለህ አንተ ላገር ወድቀህ፣

ምንህ-ሆነ አድዋ እስቲ ልጠይቅህ።

(ለእንትና እና ለእንትና “አድዋ ምኑ ነው?” ለሚሉት ለነ እንቶኔ፤

እንደወረደ የተጻፈ።)

ማርች 1/2012፤ ሲልቨር ስፕሪንግ፤ ሀገረ ማርያም።