Sunday, March 30, 2014

ሥጋታችን “አክራሪ” ሃይማኖተኝነት ሳይሆን አክራሪ “አይማኖተኝነት” ነው

(READ PDF HERE) ይህንን ጽሑፍ ለመጀመር ትርጓሜ የሚያስፈልጋቸውን ሐሳቦች ብያኔ በመስጠት እነሣለኹ። ሃይማኖት እና አይማኖትበጥሬ ትርጉሙ ከወሰድነው ሃይማኖት “አሚን፣ ማመን፣ እምነት፣ አምልኮ” ማለት እንደሆነ የግእዝ እና የአማርኛ ቀዳማውያት መዝገ ቃላት ደራስያን ደስታ ተ/ወልድ እና ኪዳነ ወልድ ክፍሌ ይነግሩናል። ከዚያም አልፎ በዕለት ተዕለት ቋንቋችንና አነጋገራችን ካየነው ደግሞ እያንዳንዳችን የምንከተለውን እምነት እና ሃይማኖት በየስሙ እየጠራን እገሌ የተሰኘው ሃይማኖት ተከታይ ነን እንላለን።
አይ” ደግሞ “የአሉታና የነቀፌታ ቃል ንኡስ አገባብ ሲኾን በቦታ፣ በኀላፊ፣ በትንቢት፣ ይገባል። ለምሳሌ “አይ ወዲያ፤ አይ በሉ” እንደሚባለው ነቀፌታን የሚያሳይ አገባብ ነው። አይባልም፣ አይገባም፣ አይለም፣ አይኾንም” የምንለውን ማስታወስ ነው።
ያዲሳባ ሰው አይጦም አይበላ፤
አያርፍ አይሠራ” እንዲሉ አለቃ ደስታ ተ/ወልድ።
ከ“ሃይማኖት” አሉታን የሚያሳይ “አይማኖት” የሚል ቃል መፍጠሬን ይመለከቷል። ሃይማኖተኛ እንደሚለው እምነት አልባ፣ እግዜር የለሽ (Atheist) መሆን ብቻ ሳይሆን ለሃይማኖት ጥላቻ ያለውን ሰው “አይማኖተኛ” (Antitheist) ብንል ያስኬደናል። ቃሉ ለምን እንዳስፈለገን ወደ ጽሑፉ ገባ ስንል እንገነዘባለን። በፈጣሪ መኖር የማያምኑ (Atheist የሆኑ) ብዙ ሰዎች አሉ። ግን ሃይማኖትና አማኒውን ላይጠሉ ይችላሉ። ሃይማኖትን እና አማኙን ለሚጠሉ ግን አይማኖተኛ (አንቲቴይስት Antitheist) የሚለው ይህ ቅጽል ገላጭ ይሆናል። እናብዛው ካልን “አይማኖተኛ፣ አይማኖተኝነት” ልንለው እንችላለን።

Saturday, March 15, 2014

ተግሳጽ እና ጅራፍ

(READ IN PDF):- ጌታም ወደ ቤተ መቅደስ ገባ። ቤተ መቅደሱ በንግድ ደምቆ ነበር። “ቤትየሰ ቤተ ጸሎት ትሰመይ” ብሎ ጅራፉን አነሣ። የሸቃጮቹን ገንዘብ በተነ፣ ገበታቸውን ገለበጠ። ያጎሯቸውን እንስሳት አስወጣ። ቅዱስ ዳዊት “የቤትህ ቅናት በላኝች” እንዳለው ሆነ።

በየዓመቱ የዐቢይ ጾም/ ሑዳዴ ሦስተኛ ሳምንት ከፍ ተብሎ የተጠቀሰው ታሪክ የሚታወስበት ሲሆንም ቅዱስ ያሬድ በሠራለት መዝሙር ስያሜም “ምኩራብ” እየተባለ ይጠራል። በመላው ዓለም በሚገኙ የኢትዮጵያ አብያተ ክርስቲያናት ዘንድ ስለ ክርስቶስ ተግሳጽ እና ኋላም ጅራፍ ገምዶ ከቤተ መቅደሱ ነጋዴዎችን ማስወጣቱ የሚተረክበት በዓል ነው።