Sunday, April 19, 2015

ለሰማዕታቱ አታልቅሱ (ሰማዕታተ ሊቢያ)

“ጌታ ኢየሱስ ከሥልጣኑ መላእክት ጋር ከሰማይ በእሳት ነበልባል ሲገለጥ፥ መከራን ለሚያሳዩአችሁ መከራን፥ መከራንም ለምትቀበሉ ከእኛ ጋር ዕረፍትን ብድራት አድርጎ እንዲመልስ በእግዚአብሔር ፊት በእርግጥ ጽድቅ ነውና።” 
(2ኛ ተሰሎንቄ 1፥ 6-7)
አይሲስ የተባለ ነፍሰ ገዳይ ድርጅት በስደት የሚገኙ 28 ኢትዮጵያውያን ክርስቲያኖችን መግደሉን በፊልም አቀናብሮ አቅርቧል። የዓለም ሚዲያዎች በሙሉ ዛሬ እሑድ ይህንን ዜና ሲያሰራጩ ውለዋል። የተገደሉት ሰዎች “ኢትዮጵያውን መሆናቸውን ገና አላጣራኹም” ያለው የኢትዮጵያ መንግሥት እና ዜና ማሰራጫው ኢቲቪ (ያሁኑ ኢብኮ) በደፈናው ግድያውን ማውገዙን ገልጿል። የሞትነውማ በርግጥም ኢትዮጵያውያን መሆናችንን በሊቢያ ዋና ከተማ የሚገኝ ወንድም (ዘርዓያዕቆብ) በፌስቡክ ገጹ አስነብቦናል። (ሙሉውን ስሙን ከመናገር መከልከሉን መርጫለሁ፤ እርሱማ በሰፊው ነው የጻፈው። እግዚአብሔር ይጠብቀው ባለበት)።

ትናንት ከትናንት በስቲያ በደቡብ አፍሪካ ያየነው ነገር እንቅልፍ እንደነሣን፣ ሣጋችንን በምራቃችን እያስታገስን፣ ዕንባችንን ወደ ውስጥ እየዋጥን ባለበት በዚህ ሰዓት የእነዚህ ወገኖቻችንን እንዲህ ባለ ሁኔታ መገደል በግድ ታፍኖ የቆየውን ዕንባ ድንበሩን ጥሶ እንዲፈስ አስገድዶታል። ብዙ ኢትዮጵያውያን ሐዘናቸውን በመግለጽ ብቻ መታገስ እንዳልቻሉ ያስታውቃል። ግን ምን ያድርጉ?
እነዚህ ክርስቲያኖች ሰማዕታት ናቸው። ሰማዕት ማለት ምስክር ማለት እንደመሆኑ በጥይት የተደበደቡት፣ አንገታቸውን የተቀሉት በምንም ምክንያት ሳይሆን “የመስቀሉ ሕዝቦች” (ወይም ክርስቲያኖች) በመሆናቸው ነው። “ይህ ስለ ክርስቶስ ተሰጥቶአችኋልና፤ ስለ እርሱ መከራ ደግሞ ልትቀበሉ እንጂ በእርሱ ልታምኑ ብቻ አይደለም፤ (ፊልጵስዩስ1፥29)
ይልቁን ይህ አይሲስ ክርስቲያኖችን “የመስቀሉ ሕዝቦች” ማለቱን እውነት አለው። አፉን ከፍቶ፣ ፊቱን ጸፍቶ ያናገረው መንፈስ ቅዱስ ነው። የአይሑድ መምህር ቀያፋ ስለ ጌታ ሲናገር “አንዱ ስለሁሉ ሊሞት ይገባዋል” እንዳለውና እርሱ ሳያውቅ በርግጥም እውነት እንደተናገረው ሆነ። አዎ የመስቀሉ ሕዝቦች፣ የመስቀሉ ልጆች ነን።  
እነዚህ ክርስቲያኖች ስለኖሩት ኑሮ፣ ስለ ሕይወታቸው ምንነት አናውቅም። ገና ያልተጠመቁ ንዑሰ-ክርስቲያን ሆነው ቢሆን እንኳን በዚያች ሰዓት ስለ ክርስቶስ ሰማዕት በመሆናቸው ደማቸው (ደመ ሰማዕታት) ጥምቀት ሆኗቸው (ልክ እንደ ፈያታዊ ዘየማን፤ በቀኝ እንደተሰቀለው ወንበዴ) ወደ መንግሥተ ሰማያት ይገባሉ። በንስሐ ያልኖሩ ቢሆኑ ራስን ለሃይማኖት አሳልፎ ከመስጠት፣ ስለ ሃይማኖት ከመሞት በላይ ምን ንስሐ አለ? ስለዚህም የእነዚህ ሰማዕታት በረከታቸው፣ ጸሎታቸው ትድረሰን ማለት ተገቢ ይሆናል።

ወገኖች፤ እንግዲህ ስለ ቅ/ጊዮርጊስ፣ ስለ ቅ/እስጢፋኖስ፣ ስለ አቡነ ጴጥሮስ መተረክ ብቻ ሳይሆን ስለ ሰማዕትነት እና ሕይወቱ መማር፣ ማወቅ፣ መጠንቀቅ ያለብን ጊዜ ዓይኑን አፍጥጦ እየመጣ ነው። 

2 comments:

Anonymous said...

ወገኖች፤ እንግዲህ ስለ ቅ/ጊዮርጊስ፣ ስለ ቅ/እስጢፋኖስ፣ ስለ አቡነ ጴጥሮስ መተረክ ብቻ ሳይሆን ስለ ሰማዕትነት እና ሕይወቱ መማር፣ ማወቅ፣ መጠንቀቅ ያለብን ጊዜ ዓይኑን አፍጥጦ እየመጣ ነው።

ኦ እግዚኦ አድህን ህዝበከ ወባርክ ርስተከ

shishay hadush said...

ወገኖች፤ እንግዲህ ስለ ቅ/ጊዮርጊስ፣ ስለ ቅ/እስጢፋኖስ፣ ስለ አቡነ ጴጥሮስ መተረክ ብቻ ሳይሆን ስለ ሰማዕትነት እና ሕይወቱ መማር፣ ማወቅ፣ መጠንቀቅ ያለብን ጊዜ ዓይኑን አፍጥጦ እየመጣ ነው።

ኦ እግዚኦ አድህን ህዝበከ ወባርክ ርስተከ

Blog Archive