Friday, April 24, 2015

ሌላ ሐዘንና ሌላ ለቅሶ ሁሉ ሐዘንም ለቅሶም አልመስል አለ!!!!

ሌላ ሐዘንና ሌላ ለቅሶ ሁሉ ሐዘንም ለቅሶም አልመስል አለ። ሌላ ሳቅ፣ ሌላ ጨዋታም አልጥም አለ። ሌላ ንግግር ሌላ ውይይትም ከልብ ጠብ አልል አለ። ከመቅረት መዘግየት ይሻላልና ዘግይተንም ማስታወስ ከቻልን አንድ ነገር ነው። እነሆ።
1. ታላቁ አባት ንቡረ ዕድ ክፍለ ዮሐንስ መኮንን በዚህ ሳምንት አርፈው (ሚያዝያ 11 ቀን 2007 ዓ.ም.) ምንም እንዳልሆነ ሁሉ በጥቂት ዘገባ ብቻ አለፍነው። ቤተ ክርስቲያንን በብዙ ጥብዓት ያገለገሉ የወንጌል ገበሬ የቅኔ አባት ነበሩ።ማኅበረ ቅዱሳን ስለ ቅኔ ያዘጋጀውን ቆየት ያለ ቪዲዮ (ከዩቲዩብም ከሌላም) ፈልጋችሁ ብታገኙና ብትመለከቱት ምን ዓይነት ሰው እንደነበሩ ብልጭ ያደርግላችኋል። ወይም ከታች ከኅዳጉ ላይ አስቀምጬላችኋለሁ።
2. ይህ ሳምንት አርመናውያን ክርስቲያኖች በኦቶማን ቱርኮች የጅምላ ጭፍጨፋ የተደረገባቸው 100ኛ ዓመት የሚታሰብበት ነው። ከአንድ ሚሊዮን በላይ ኦርቶዶክሳውያን አርመኖች ልክ እንደዛሬው እንደ አይሲስ ባለ ጭካኔ የሰለሙትን አስልሞ፣ የቀሩትን ገድሎ፣ የቀሩትን ከአገራቸው አፈናቅሎ አባሮ ግዛታቸውን የወረሰበት 100ኛ ዓመት ነው። አይሁዶች በናዚ ጀርመኖች ከመጨፍጨፋቸው ቀድሞ የተፈጸመው ትልቁ ጭፍጨፋ ይህ ነው። አሜሪካና አንዳንድ አገሮች (ቱርኮችን ላለማሳዘን) ዛሬም "ጄኖሳይድ ነው" ለማለት አፍረው ተቀምጠዋል።

የአርመን ሕዝብ መጠጊያ ባጣባቸው በነዚያ ዘመናት መሸሸጊያ የሆነቻቸው አገራችን ኢትዮጵያ ናት። አርመናውያን በኢትዮጵያ ያላቸውን እና የነበራቸው ታሪክ በሰፊው የሚያትት ነገር እስካሁን ባላገኝም በዘመናዊት ኢትዮጵያ ዕድገት ውስጥ ትልቅ አስተዋጽዖ ካደረጉ ትውልደ-ሌላ ኢትዮጵያውያን መካከል አርመን-ኢትዮጵያውያንም አያሌ እንደሆኑ ግልጽ ነው።
አዲስ አበባ ያላችሁ ከአራት ኪሎ ወደ ፒያሳ በሚወስደው መንገድ ላይ ያለውን ቤተ ክርስቲያናቸውን ጎራ ብላችሁ ብትጎበኙ ብዙ ትጠቀማላችሁ።
ይቆየን
ማስረጃዎች፦
1.      ስለ ንቡረ ዕድ እረፍት ዜና፦ (http://eotcmk.org/site/-mainmenu-18/1837-2015-04-22-13-12-59)
2.     ንቡረ ዕድ ስለ ቅኔ ከተናገሩት፦ (http://multimedia.eotcmk.org/video/?video=5259150611

3.     ስለ አርመንያ ዘር ማጥፋት ታሪክ፦ http://goo.gl/BtqbSY

1 comment:

Anonymous said...

Thank you. Great reminders.

Blog Archive