Wednesday, August 31, 2016

ቀልድና ሥላቅ፤ ብሶት መግለጫና ሰላማዊ መታገያ ዘዴ?

ሰው መሰሏ ፍጡር (ዝንጀሮ/ ጦጣ መሰሏ ፍጡር) ድንቅነሽ (ሉሲ) የሞተችው ከዛፍ ላይ ወድቃ መሆኑን «የዘርፉ ባለሙያዎች» (በትክክልም የዘርፉ ባለሙያዎች የሚለው ቃል የሚገባቸው ሰዎች) ግኝታቸውን ካሳወቁ ወዲህ ዜናው ትልቅ መነጋገሪያ ሆኗል። እኔ ከሰማኋቸው ውስጥ ቢቢሲ እና ኤን.ፒ.አር የተባለው ተወዳጅ የአሜሪካ ራዲዮ ደጋግመው ሲናገሩ ሰምቻለሁ። እንደ አቅሚቲ ደግሞ ኢቲቪም ዜናውን ማወጁን ከዚሁ ከፌስቡክ ተረድቻለኹ።
ብዙ ወገኖች አጋጣሚውን በመጠቀም ጥርስ የማያስከድኑ ቀልዶችን በኢቲቪ እና በኢሕአዴግ ላይ ሲያወርዱ ነበር። ብዙው ሰው ቀልዱን አገሪቱ ካለችበት አስጨናቂ ሁኔታ ትንሽ እረፍት መውሰጃ እንዳደረገው ያስታውቃል፤ እኔን ጨምሮ። አንድ ሁለት ወዳጆቼ ገና ለገና ኢቲቪን ለመውቀስ ይህንን ሳይንሳዊ ውጤት ማጣጣል ተገቢ እንዳልሆነ ሐሳባቸውን ኮምጨጭ ብለው አካፍለዋል። በርግጥ በቀልድ የተናገሩትም ሰዎች ይህ የሚጠፋቸው አይመስለኝም። አንድ ቁምነገር ግን በዚሁ አጋጣሚ ማስታወስ ፈለግኹ።

Sunday, August 28, 2016

ሊታይና ሊደመጥ የሚገባው መልእክት

ሊታይና ሊደመጥ የሚገባው መልእክት
+++++
ስለ እውነት የሚናገሩ ብዙ ሰዎች አሉ። አንዳንዶቹ «ለእውነት የሚቆሙት» ጥቅም የሚያገኙ ሆኖ ሲታያቸው ብቻ ነው። አንዳንዶች ግን ስለ እውነት የሚቆሙት ቀጥሎ የሚመጣው ውጤት የሚጠቅማቸውም ሆነ የማይጠቅማቸው መሆኑ ብዙም ሳይሰቅቃቸው ነው። በመጀመሪያው ዘርፍ ያሉ ብዙ አፈ ጮሌ ሰዎች እናውቃለን። ከነዚህ አፈጮሌዎች መካከል ደግሞ ብዙዎቹ በምንኩስና በቅስና ስም ስለ እውነት ሳይሆን እውነትን ረግጠው የቆሙ ናቸው። ይሁን እንጂ ስለ እውነት ከመናገር ወደኋላ ከማይሉት እና በሌላ የሕይወታቸውም መስመር በእውነትና በትህትና ሲመላለሱ ከማውቃቸው መካከል በቪዲዮው ላይ የምንመለከታቸው ቀሲስ አሸናፊ ዹጋ (Ashenafi Wake) አንዱ ናቸው። ከዚህ በፊት ያስተላለፏቸውን መልእክቶችም በጥሙና ተመልክቼ ሳበቃ ለርሳቸው የነበረኝ ሐሳብ ትክክል መሆኑን የበለጠ አረጋግጦልኛል። እንድትመለከቱም እጋብዛለኹ፡
በዚህኛው ቪዲዮ ለቤተ ክርስቲያናችን አባቶች (በአገርም በውጪም) ላሉት እጅግ በትልቅ ትህትና ጥሪ አቅርበዋል። በቪዲዮው ሁለተኛ ክፍል ለጠ/ሚ ኃ/ማርያምና ለባለስልጣኖቻቸው ጥሪ አቅርበዋል፤ ተግሳጽም አስተላልፈዋል። ይህንን በቃለ እግዚአብሔር የተመላ እና እውነቱን በግልጽ የሚያቀርብ መልእክት በጎ ኅሊና ላለው ሰው ማድረስ ተገቢ መሆኑ ስለተሰማኝ እነሆ «ሼር» አድርጌያለኹ።
ረዥም ዕድሜ ይስጥልን፤ ቀሲስ።


Wednesday, August 24, 2016

ራስዎን ከጎሰኝነትና ከዘረኝነት ይጠብቁ!!!!!! እንዴት?

አገር ያወቀው፣ ፀሐይ የሞቀው ተረት ባስታውሳችሁ ለውይይታችን የበለጠ ይረዳናል። አንድ መንገደኛ ሰው ይመሽበትና ከአንድ መንደር ለማደር «የእግዜር እንግዳ፤ አሳድሩኝ» እያለ ይለምናል። የሚያድርበት ቦታ ቢፈልግም በልቡ አንድ ነገር ሰግቷል። የዛ አገር ሰዎች «ቡዶች ናቸው» ሲባል ስለሰማ ቀርጥፈው እንዳይበሉት ፈርቷል። ይሁንና «ቤት የግዚሐር ነው» ያለ ገበሬ በሩን ይከፍትለትና ያስተናግደዋል። የሰውየው ልጆች እግሩን ሲያጥቡት፣ ባለቤቱ ራት በሰፌድ፣ ጠላ በሽክና ታቀርብለታለች። እስካሁን በተደረገለት ሁሉ እጅግ የተደሰተው እንግዳ ዘና ማለት ሲጀምር በልቡ የቋጠራትን ጥያቄ ያወጣል። «ለመሆኑ የቡዶቹ መንደር የት ነው?» ይላል። የቤቱ ባለቤትም ሲመልስለት «እዚያ ማዶ ያሉት ሰዎች እኛን ይላሉ፣ እኛም እነርሱን እንላለን» ሲል ይመልስለታል። የጎሰኝነቱም እንደዚያው ነው። ሁላችንም ጣት እንደተጠቋቆምን አለን። አዳሜ ሁሏም ጥቂት ጥቂት ጎሰኝነት እና መንደርተኝነት አታጣም።
«ዘረኝነት» መጥፎ መሆኑን ሁላችንም ብናምንም በዚህ ዘመን የተለያየ ጎሳ እና ብሔረሰብ ስላለን ያንን ተያይዞ የሚመጣው ችግር፤ ማለትም ጎሰኝነት፤ አጥቅቶናል። የእርሱን ዘረኝነት ዘረኝነት ባይለውም ዘረኛውም ሰውዬ ጭምር ዘረኝነትን ሲቃወም ልንሰማው እንችላለን። በርግጥ አገራችን ውስጥ ያለው ችግር «ዘረኝነት» ሳይሆን «ጎሰኝነት» መሆኑን ፕ/ር መስፍንን ጨምሮ ብዙ ሰዎች ይናገራሉ። ሁላችንም ዘራችን እና ቀለማችን ጥቁር ስለሆነ የተለያየን አይደለንም።በአገራችን ጉዳይ የሚጻፉ ጽሑፎች ግን ሁለቱን ቃላት በተለዋዋጭነት ይጠቀሙበታል። ለጊዜው ዘረኝነት ስንል ጎሰኝነት ማለታችን እንጂ እንደ ጥቁሮች እና ነጮች ችግር ያለ አለመሆኑ ከግንዛቤ ይግባና ሁላችንም ዘረኝነት የምንቃወም ነገር ግን ጥቂት ጥቂትም ቢሆን ዘረኝነት የሚያጠቃን መሆናችንን እንገንዘብ።

Wednesday, August 17, 2016

ወርቅ አገር እና ኮረት አገር

አሜሪካ በኢትዮጵያ ጉዳይ ኮንሰርንድ (concerned) ሆኛለኹ ብላ ብዙ ጊዜ ስትናገር ሰምተናታል። አሜሪካ ግን እንዲህ በቀላሉ ኮንሰርንድ አትሆንም። በዓለም ላይ የሚነገረውን የሚፈ**ውን ሳይቀር የምታውቅ ከባድ አገር ስለሆነች፣ ከአይሲስ እስከ አልቃኢዳ አሸባሪዎች የሚያደርሱትን አያሌ ዘግናኝ ድርጊት በየደቂቃው ሲመዘግብ የሚኖር ቢሮክራሲ ባለቤት ስለሆነች በቀላሉ ኮንሰርንድ አትሆንም (አይኮነስራትም?)። ደግሞም በመካከለኛው ምሥራቅ ሲኒ ሲሰበር እንኳን ኮንሰርንድ እንደምትሆነው በሌላው ዓለም ተራራ የሚያክል ሕንጻ ቢደረመስ ላይኮነስራት ይችላል።

Tuesday, August 16, 2016

ክላሽና መስቀል

በፌስቡክ መንደር መነጋገሪያ ሆኖ የዋለ አንድ ፎቶግራፍ ሁለት ካህናት እርበርሳቸው እጅ እየተነሣሡ መስቀል ሲሰላለሙ (ሲሳለሙ) ያሳያል። ፎቶውን መነጋገሪያ ያደረገው አንዱ ካህን ሌላውን መስቀል ስላሳለመው ሳይሆን (የተለመደ ሥርዓት በመሆኑ) ከቀሳውስቱ አንዱ ከመስቀሉ ጋር ክላሽ ያነገበ መሆኑ ነው። ፎቶውን ያነሣው የፎቶው ባለቤት የፎቶውን ሥፍራ፣ እና አጠቃላይ ዐውዱን አልነገረንም። የፎቶው ባለቤት ስለ ፎቶው ዝርዝር ማብራሪያ ጽፎ ነገር ግን በፌስቡክ እንደተለመደው የውሰት-ውሰት/የተውሶ ተውሶ/ እኔ ጋር ያደረሰው ሰው ፎቶውን እንጂ መግለጫውን አልወሰደውም ይሆናል። ግማሽ ጥሎ ግማሽ አንጠልጥሎ መሔድ ሁሌም የሚያበሳጭ የኢትዮጵያውያን ጠባይ ስለሆነ ምንም ማድረግ አይቻልም። አንዱ የጻፈውን ሌላው ገልብጦ ሲለጥፍ ከየት እንዳገኘው እንኳን ለመናገር ትንሽ አክብሮት አይሰጥም። የአእምሮ ባለቤትነት ጽንሰ ሐሳብ የሌለበት ልማድ ነው ያለን። ምናልባት አልለመድነው ይሆናል እንጂ በጥንታዊው ትምህርት ቤት አንዱ የሌላውን ሐሳብ ሰርቆ በራሱ ስም መጠቀም ጸያፍ እንደሆነ መምህራን ይናገራሉ። ተረት እንኳን «አለ እገሌ፣ አለች አሉ እገሌ» የምንለው አለ ነገር አይደለም።

Saturday, August 13, 2016

ቅሬታና አመጽ፡- የለውጥ መጀመሪያ (ማዕበል የአብዮት ዋዜማ)

አዲስ አበባ ለብዙ ዓመት የኖርኩት አዋሬ ነበር። ጠዋት ወደ ሥራዬ ሳቀና፣ ባለወልድንና ሥላሴን በቀኝ፤ እነ በዓታን፣ ኪዳነ ምህረትንና ግቢ ገብርኤልን በግራ አልፌ ነው የምሔደው። በርግጥ ፓርላማውንና ቤተ መንግሥቱን እንዲሁም አሸዋ ቆልለው ምሽግ ቢጤ የሠሩ፤ በምን አመካኝተን ሰው እንደብድብ የሚሉ የሕወሐት ወታደሮችንም አልፌ ነበር የምሔደው። እናም የአብያተ ክርስቲያናቱ በዓላት በሚሆኑበት ጊዜ ግራና ቀኝ የሚቀመጡት የኔ ቢጤዎች የሚለምኑበት ዜማ አንዳንዴ አፌ ላይ ተለጥፎ ይቀራል። በተለይ አንዳንዶቹ የኔቢጤዎች እጅግ የሚያምር ድምጻቸው ከሰው ጆሮ ቶሎ አይጠፋም። አንዳንድ ቃላትም ሳትፈልጓቸው ተደጋግመው ሲነገሩ ትሰሙና ጭንቅላታችሁ ውስጥ ተቀርቅረው ይቀራሉ። ልክ እንደየኔ ቢጤ የልመና ዜማ፤ ጠዋት ሰምታችሁት ቀኑን ሙሉ በልባችሁ ስታንጎርጉሩት እንደምትውሉት። ከነዚህ ቃላት መካከል የሕወሐት ሰዎች የሕዝቡን ተቃውሞ ለማጣጣል በፈረንጅ አፍ ቃለ ምልልስ በሰጡ ቁጥር የሚያነሷት «Grievance/ግሪቫንስ» የምትል ቃል ጆሮዬን ስትጠልዘው ከርማ ከውስጤ አልወጣ ብላለችና ጽፌ ብገላገላትስ።

Thursday, August 11, 2016

ይድረስ «Status Quo»ው ብቻ ለሚመቻችሁ ወዳጆቼ

Status Quo የሚለውን ቃል በአንዲት ቃል እስር፣ ትርጉም አድርጌ ባቀርባት ደስ ባለኝ። ርዕሴንም በአማርኛ አድርጌው አርፍ ነበር። ግን አስቸጋሪ ስለሆነ የእንግሊዝኛ መዝገበ ቃላት አማከርኩ። እንዲህ ተርጉሞታል። Status Quo: the current situation; the way things are now» (Source: Merriam-Webster's Learner's Dictionary) በቀላሉ ስንተረጉመው «አሁን ያሉት ነገሮች እንዳሉ፣ ሳይለወጡ» (የነበረው እንዳለ ወይም 'ዘሀሎ' እንበለው የግእዙን ወስደን?) እንደማለት ነው። ነገሮች/ things የተባሉት ደግሞ «social or political issues. ማኅበራዊ እና ፖለቲካዊ ጉዳዮች» መሆናቸውን አክሉበት።
በዚህ በሰሞኑ ሕዝባዊ እምቢተኝነት ስታትስኮው ሊለወጥ እንደሚችል የተረዱ ነገር ግን የዚህን ለውጥ ነገር በእጅጉ የፈሩ ብዙ ሰዎችን ተመልክተናል። መግለጫ በመግለጫ ካደረጉን ፓትርያርክ ማትያስና የበታቾቻው እንዲሁም የሙስሊም መሪዎች እና ሌሎች ቤተ እምነቶች በተጨማሪ ሌሎች ወገኖችም የየአቅማቸውን ጥብቅና ለስታትስኮው በመቆም ላይ ናቸው።

Monday, August 8, 2016

ማኅበራዊ ሰንሰለቱ (social fabric) ቀጥኗል ወይስ ተበጥሷል?

አዲስ አበባ የሚገኘው የአሜሪካ ኤምባሲ ዛሬባወጣው መግለጫ እንዲህ ብሏል። «The U.S. Embassy expresses its deep condolences to those who suffered as a result of the violence and regrets the damage to livelihoods, economic development, and the social fabric that such violence brings. ከሰሞኑ በተነሣው አለመረጋጋት በሰው ልጆች ሕይወት ላይ፣ በኢኮኖሚ ዕድገት ላይ እና በማኅበራዊው ግንኙነቱ ላይ ለደረሰው ጉዳት የአሜሪካ ኤምባሲ ጥልቅ ሐዘኑን ይገልጻል» ይላል። 
ኤምባሲው በመግለጫው የተጠቀማት አንዲት ኃይለ ቃል ላይ መወያየት አስፈላጊ ይመስለኛል። መግለጫውን ያላያችሁ ሰዎች ብዙም አላመለጣችሁም። ሁልጊዜ የሚወጣ የመንግሥታት መግለጫ ላይ አንዳንድ ዐ.ነገሮችን፣ ቀኖችን መቀየር ብቻ ነው። «እንዳያማህ ጥራው፣ እንዳይበላ ግፋው» ዓይነት ነገር ናት። ያንንም ያንንም ላለማስቀየም፣ ምንም አላሉም ላለመባል የምትወረወር «እንደፍጥርጥራችሁ» የምትል መግለጫ። አንበሳንና ሚዳቋን እኩል «አንተም ተው አንተም ተው» የምትል ጉልበተኛውን እና ጉልበት የሌለውን በአንድ ሚዛን የምታስቀምጥ ግፈኛ መግለጫ። ግርማዊ ቀ/ኃሥላሴ ጣሊያን ኢትዮጵያ ላይ ክንዷን ባነሳችበት ወቅት እንዲህ ባለው የመንግሥታቱ ድርጅት/ሊግ መግለጫ ተከፍተው ያቀረቡት ትንቢታዊ መግለጫ ዛሬም ድረስ የሚታወስ ትንቢታዊ ንግግር ሆኖላቸዋል። ሕዝቤን ከጣሊያኖቹ ባትታደጉ ግን «እግዚአብሔርና ታሪክ ውሳኔያችሁን ያስታውሱታል “God and history will remember your judgment.” እንዳሉት ሆኗል።  

Saturday, August 6, 2016

ይድረስ ለመጥረቢያው እጀታዎች!!!!!!

ከዕለታት በአንድ ቀን፣ ዘመዶቻቸው በመጥረቢያ የተጨፈጨፉባቸው ዛፎች ስብሰባ ተቀመጡ አሉ። አሉ የተባሉ የዛፍ ዘሮች በሙሉ ከነምሬታቸው እና ቁጣቸው ተሰበሰቡ። እነሆም ስብሰባው አንዲት አጀንዳ ብቻ ነበረችው። “እንደዚህ የሚጨፈጭፈንን መጥረቢያ ምን እናድርገው?” የምትል አንዲት ቀጭን አጀንዳ።
ዘመዶቻቸው በመጥሪያ ያለቁባቸው የዛፍ ዘሮች በሙሉ ተራቸው እየጠበቁ ሐሳባቸው አጎረፉ። ገሚሱ “መጥረቢያውን በትልቅ ጉድጓድ ቆፍረን እንቅበረው” አሉ። አንዳንዶቹ “አይደለም፤ ሁለተኛ የአገራችን መሬት ለመቀበሪያው እንኳን አንዳይሆን ከአስገምጋሚ ወራጅ ወንዝ ውስጥ እንጣለው። እየደፈቀ፣ ከአገር አውጥቶ ከበረሃ ይጣለው” አሉ። አንዳንዶቹም “እሳት አንድደን እናቅልጠው። የቀለጠውንም ከወራጅ ውሐ ውስጥ እንቀላቅለው” አሉ። ሌሎቹም የመሰላቸውን፣ ንዴታቸውን እና ቂማቸውን የሚያበርድላቸውን ውሳኔ ሁሉ ሰጡ።

Wednesday, August 3, 2016

"ከመላው አገር ወዳድ ክርስቲያኖች ለተጋሩ (ትግሬ) የኦርቶዶክስ ተዋሕዶ ክርስቲያኖች በሙሉ የቀረበ የወገንህን፣ አገርህን እና ሃይማኖትህን አድን ወቅታዊ ጥሪ!!!!!!"

 “አፍህን ስለ ዲዳው ክፈት፤ ተስፋ ስለሌላቸውም ሁሉ ተፋረድ … ለድሀና ለምስኪን ፍረድ።” (ምሳሌ 31፡8-9)
መነሻ
(READ IN PDF):- ትግራይ የኢትዮጵያ አገራችን የክርስትና/እስልምና እምነቶች እና የሥነ መንግሥት አስኳል ሆኖ ለዘመናት የዘለቀ ክልል ነው። የአገራችን ኪነ እምነትም ሆነ ኪነ ሕንጻ፣ ኪነ ዜማም ሆነ ኪነ መንግሥት ማማ ትግራይ ነው። ትግራይን ከኢትዮጵያ ነጥሎ ማሰብ እንደማይቻለው ሁሉ ኢትዮጵያን ከትግራይ ነጥሎ ማሰብ አስቸጋሪ ነው። ይሁን እንጂ ይህ የእምነትና የአገር ማማና ምሦሦ የሆነ ሕዝብና ክልል በዘመናችን ታሪካዊ ጥያቄ ቀርቦለት ይገኛል።
ታሪካዊ ጥያቄው አገራችን ኢትዮጵያ በማኅበራዊ እና ፖለቲካዊ ቀውስ ውስጥ እንደምትገኝ እና በተለያዩ የአገሪቱ ክፍሎች ውስጥም የሰላምና መረጋጋት እጦት በማየሉ የአገሪቱ ሕዝብ የዕለት ተዕለት ኑሮ እጅግ አስቸጋሪ ደረጃ ላይ ከመድረሱ ጋር የተያያዘ ነው። ይህ ፖለቲካዊ፣ ኢኮኖሚያዊ እና ማኅበራዊ ቀውስ ዜጎች በጅምላ የሚገደሉበትን እና በጅምላ ወደማሰቃያ እስር ቤቶች የሚጋዙበትን መከራ የተመለከተ ነው። ከታላቁ የትግራይ ክልል የበቀለው እና ላለፉት 25 ዓመታት መንበረ ሥልጣኑን የተቆጣጠረው የሕወሐት ቡድን የሚመራው ፓርቲ እና መንግሥት ለዚህ ቀውስ ዋነኛው ምክንያት መሆኑ ለታሪካዊው ትግራይ ፈተና ሆኖ ቀርቧል።
ይህ ፓርቲና መንግሥት ላለፉት 25 ዓመታት የዘረጋው የአፈና እና የሰቆቃ ሰንሰለት ከሕዝቡ አቅም በላይ በመሆኑ በተለያዩ አካባቢዎች አመጽ በመቀስቀስ ላይ ከመሆኑም ባሻገር አመፁ የአገሪቱን ሕልውና የሚፈታተን ሊሆን እንደሚችል የብዙ ባለሙያዎች እና ተመልካቾች ግምት ነው። ስለዚህም አገራችን ልትወጣው የማትችለው ቀውስ ውስጥ ከመግባቷ በፊት ሕወሐት በስሙ ለሚነግድበት የትግራይ ሕዝብ ጥሪ ማድረግ አስፈላጊ ሆኖ ተገኝቷል።

Blog Archive